根據瑞典不明文規定，辦公室、親戚家中、朋友聚餐派對等等，永遠都有一樣唔食得嘅食物。呢樣食物除咗自己唔會食，每當問起身邊嘅人要唔要品嘗，人人總會耍手擰頭，斷然拒絕。如果你盛意拳拳，同枱嘅人或者會表現得千不甘百不願，然後將呢樣「禁忌食物」切成一半，只拎走其中半份。到你再問其他人，下一位好可能會將碟上剩低嘅半份「禁忌食物」再切成一半，然後拎走其中半份……最後「禁忌食物」會被切到不能再細，等到凍晒，直接被丟棄。到底係咩食物咁神秘、咁唔受歡迎？呢樣「禁忌食物」只餐都會出現。佢唔係臭魚、唔係咩瑞典特產，講緊嘅係餐枱上每碟嘅最後一件。
喺唔少瑞典人眼中，擅自拎走餐枱上嘅最後一件食物會被視為冇禮貌嘅行為。而通常食物越受歡迎，最後一件就越可能會滯銷。因為人人都想將最好食嘅留俾其他人。最顯而易見嘅例子有瑞典辦公室公家食嘅蛋糕。尤其是大家同事關係未到好熟，人人都唔好意思去奪走最後嗰件蛋糕。通常美味嘅蛋糕被分到最細後，喺雪櫃雪到過晒期就會被丟入垃圾筒。
呢種咁獨特嘅禮讓文化我都係長大後移居到瑞典先見識到。由細到大，長輩都教我哋要珍惜食物，每一粒餐都得來不易，每一滴都唔應該浪費。瑞典呢種互相禮讓嘅精神係好，但我更加欣賞香港人嘅直接。喺瑞典生活期間我都被瑞典文化薰陶唔少，或者都係時候等我將香港人珍惜食物嘅精神傳返去瑞典，一同爭取自己心中最想要嘅一塊。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter