之前同大家介紹過唔少瑞典嘅新舊傳統節日，有留意開嘅讀者都應該唔難會留意到瑞典人的確咩都鍾意慶祝一餐。今日同大家介紹一個香氣四溢嘅瑞典節日——肉桂卷節，瑞典人叫佢做Kanelbullens dag。
瑞典語Kanel，解作肉桂。bulle，有包點嘅意思。而Kanelbullens dag，譯返做中文就係「肉桂卷節」。每年嘅十月四號就係瑞典肉桂卷節，喺呢日瑞典人並無額外嘅慶祝活動。因為肉桂卷節與否，瑞典人都同樣會食吃肉桂卷。
咖啡配茶點對瑞典人嚟講係生活必需，而肉桂卷喺瑞典茶點界中有著係天王級地位。就好似我哋香港嘅菠蘿油、蛋撻咁，下午茶點少得？我從未遇過唔喜歡肉桂卷嘅瑞典人，肉桂卷喺瑞典更加係隨處可見。除咗麵包店，便利店、超級市場、油站都會見到。每次去便利店買咖啡，店員都自然會問你要唔要加少少錢要埋肉桂卷。每次由其他地方飛返斯德哥爾摩，一落機除咗覺得凍，令人感受最強烈嘅必定係撲鼻而來嘅咖啡加肉桂卷嘅氣味。只要聞到呢陣甜甜嘅香味，我就知道我又返咗嚟瑞典喇。
經過多年瑞典文化嘅洗禮，我發覺肉桂卷並唔係一個包咁簡單，而係一種保證，佢畀人一種安心嘅感覺；無論風雪再大，天氣再凍，有肉桂卷就即係可以坐低歇一歇，有肉桂卷就等於有熱辣辣咖啡飲，有肉桂卷就代表溫暖飽足。雖然一年一度嘅Kanelbullens dag啱啱過咗，但對瑞典人來講，每一日都係以感恩嘅心去享用肉桂卷嘅好日子。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter
