今期資訊量唔少，直接入正題！最近大賣廣告嘅手遊《新夢境連結R》，主打「日本團隊直營RPG大作」，無論畫面、美術再加上日本有名聲優配音，坦白講土下座玩過都覺得質素唔差，果然日本開發就係唔同啲……睇到呢度，醒目嘅你應該知唔會咁簡單！事實上呢款遊戲相當有「歷史」，佢嘅「前身」係一款叫《夢境連結！Re:Connected》嘅遊戲，由北京龍拳風暴科技開發，大陸名稱叫《命運神界》，並於上年4月突然下架。講到呢度，要講少少題外話，話說大陸出版制度，遊戲要上架係需要版號審批，中國對呢方面亦相當嚴格，因此會有小部分遊戲商為避開審批，而用已經搞掂嘅版號直接套用喺自己嘅遊戲上面，所以有時大家會見到同一隻game，大陸個名同其他地方係有分別，咁做當然係唔合乎中國規矩啦！至於呢件事同《命運神界》有咩關係？就由讀者自行想像喇！講返《新夢境連結R》，雖然宣傳係用日本直營做賣點，但睇真代理名稱係叫「Mover International Games」，同大陸有名嘅遊戲公司「魔塊遊戲(Mover Games)」一樣名，只係多咗「國際」兩個字，所以「日本直營」呢個講法有冇取巧，又係由大家判斷。今期都戴晒頭盔啦，其實《新夢境連結R》都唔係第一隻「換皮」遊戲，相信日後亦會有更多。