大家仲記唔記得Epic Games因為分成問題而跟Apple對簿公堂呢件事？直到而家事件仍未解決，並喺5月再次掀起司法戰爭，相信要和解都唔易。其實分成問題只係導火線，兩間公司一直都有牙齒印，而且兩間大公司嘅糾紛同遊戲業有直接關係，故從中爆出唔少業界資訊，土下座日後會嘗試分享俾大家知。今次分享嘅係一樣幾有趣嘅資訊，話說Epic Games自家網店Epic Games Store(EGS)，一直以每周都會提供玩家一款免費遊戲做賣點，呢期免費game更加係超新作《NBA2K21》(見字好去下載！)，但原來就算不斷送games都好，成件事竟然唔會蝕本？由佢哋提供俾法庭嘅文件可以睇到，EGS每次送game都要俾返一定金額相關遊戲廠商，咁多年嚟總共係1,165萬美元，但換嚟嘅係500萬個會員，即係平均唔使3美元就吸到新會員，扣除分成同成本，每個新會員只要喺EGS消費60元，條數就已經有賺，何況同時又搶到Steam嘅市場，又搶到與各方廠商嘅友好關係，送game唔蝕之餘仲有賺呀！