自拾其力

「權力令人敗壞，無限制的權力令人無限制的敗壞」(Power tends to corrupt and absolute power corrupts absolutely.)。這是英國歷史學家Lord Acton於1887年所講嘅名言。

權力嘅探討範圍甚廣，但近年深感權力可以因為個人嘅好處而去剝削別人嘅利益。不論長官嘅機場行李、局方嘅長者綜援合資格年齡、甚至校長嘅「土皇帝」式管理，都見權力之運用不作克制，足以容易令人因一己之利而步向敗壞，連群帶埋堆人士，亦盲撐表態，無奈背後由別人付上失業、缺錢甚至喪命的代價。
 

有權力者無能力
80年代香港經濟步入先進城市之列，赤貧人口顯著減少。新市鎮及公營房屋大規模嘅興建，叫木屋區及臨時房屋區嘅苦況徹底改善。甚至於香港回歸之前，港英政府亦決心將籠屋問題根治，又點會諗到經過20多年城市發展，劏房及工廈嘅惡劣居住環境又再出現。彷彿知識型經濟社會越走向前，叫政府盈餘同反映貧富懸殊的堅尼系數同樣屢創歷史。

現今香港高官較80年代更有遠見和創意，尤其政策以及定義上更破舊立新叫全球譁然。正當香港與日本於平均人口最長壽命上叮噹馬頭，局長有遠見預計港人年紀可達至120，一夜間全民增長30幾歲，從新將60歲定為中年更可持續就業，實在超越所累積之醫療及保險專業知識，帶領香港市民仿效他們登陸後仍然於官場活躍被器重，專車接送唔使識用八達通。可悲係absolute闊斧於千億工程，卻corrupt吝嗇弱勢社群，於每月僅餘中再扣除千銀，真係所謂老有所依政策。

有能力者無權力
講起老有所為，就真係悲傷。差不多大街小巷，都見唔少長者好天曬落雨淋，為生活奔波於雷暴大雨，全日遊走幾公里起碼十小時；由冬季至夏季，執拾、破開、摺疊、拖着一大堆紙皮與及疲倦嘅身軀自食其力地穿梭。

眼見拾荒只是表面，其實內裏不乏無家人士。每天瑟縮街角，無瓦遮頭，生涯被廢紙規劃，生活被政策刪減。可悲情境路人皆見，習慣之下麻木待之。由80年代對遊客嘅好客之道，到今日對弱勢群體嘅視若無睹。不論工程引致地面沉降，又被揭發幾多不合格之螺絲帽，不斷將初定的最低安全標準去作突破。花33億用來將班次加緊壓迫，邊個估到列車會因此相撞；香港空間有限，但就不斷放寬遊客。街頭拾荒、削減津貼、交通癱瘓、醫療超載，正好反映現時管理香港之文化。回收政策、貧窮保障，急市民所急也不及國歌法。

真魅力為感染力
不斷投資大型基建，可惜看不到具體生活的轉變。昔日政策急着市民所需，今天則犧牲港人以完成大國。愛國愛港，誰人快樂；良心遺忘，每下愈況；一分耕耘理應可一分收穫，可惜現在管治變為不再是熟悉的地方，難免叫人嚮往昔日風光。其實有一種流芳百世嘅權力，叫做感染力，永遠光芒。