復活節假提早兩日出發，當日未到11點時，西九高鐵站雖然人多多，但是香港出境仍好暢順，真媽媽跟住走入中國檢查外國護照櫃檯隊伍，我與岑真就當然走去回鄉證櫃檯過關，弄了差不多十分鐘，以為過完回鄉證檢查，要有排才等到真媽媽辦完手續，因為佢持有的是加拿大護照呀。因為旅行社一早有提我地，持護照搭高鐵是要早兩個鐘頭到。怎知我們一出櫃檯，真媽已好輕鬆站在我們眼前，在等我們。問佢點解咁快，真媽媽答話冇乜洋鬼子呀，只有我們幾名香蕉假鬼子幾條友咋，所以好鬼快囉。我極目眺望，外國護照櫃檯又真係通暢冇人排隊喎！
肚子打鼓，午餐沒著落，就是為了她的護照檢查，一路行到閘口，甚麼食物店都沒有，甚麼茶水店也沒有，七仔更沒有，站內只有黑壓壓、數不盡的人頭，目測人群有近千計。去廁所人多，女性排到門外是正常吧，只因為香港女廁設計不正常，而通常男廁不用排隊，今次竟然高鐵男廁都要排隊！解決秘尿系統的需要後走出大堂，真媽媽兩母女，正在排隊等人離座，以便有個座位坐下。望望手機，11點20多分了，三條友排排企等櫈仔，還有一個多鐘才可以上高鐵啊，企到腳軟，正想蹲下，見有美女起身，我就飛身入座。我不敢望還企在我旁邊的妻女，免令自己良心受責，老就是老，沒有能力讓座呀！沒多久，一對拎住柺杖的老夫妻就在我前面，我即時閉目，直至老虎乸大大聲講，坐夠啦，上車啦，我才敢打開眼睛，碎步行進車閘呀。
我真是服咗管理高鐵的高人，你們有冇親眼看，你們有冇用心想，你們有冇去改善，因應假期及出入境情況，根據大堂等車人數去調節一下，究竟需用多少時間前等入閘呢。我們等車的人群，多到要用氧氣樽，才可以爭取到有啖氣生存。今時今日，竟然仍用港英果套工作效率同工作態度去為人民辦事。