即將卸任的食物及衞生局長高永文，日前去香港電台普通話台節目《新紫荊廣場》做嘉賓，同新來港人士分享育兒經，預祝大家父親節快樂。高局長自認係個「有原則的慈父」，仲話太太管教兒子遠比自己嚴厲得多，孩子從小就很有規矩，人生大事都會及時並依次告訴家人，排在第一位的聆聽對象從來不是自己，一般先向媽媽匯報，高局長只能排第二，有時甚至排第三。
講開又講，高永文大仔都已經30歲，細仔27歲，兩子早前在英國留學，返港後隨父母從醫。想當年，慈父教仔都有一定原則，例如孩子「扭計」是絕對佔不到便宜的，而家長處理孩子的行為要有底線，絕不容忍用極端手段爭取利益。
有一樣嘢唔講唔知，局長都未必跟足衞生署指引，事緣有初為人父的新來港人士向高永文請教，話對於沖泡幼兒奶粉的水溫，衞生署網站的指引和奶粉包裝上的說明有衝突，以致自己和太太鬧矛盾，高醫生分享自己經驗，話當年自己先用低溫水將奶粉沖開，再隔水加熱至適當溫度，亦非依照衞生署網站的指引「不低於攝氏70度」。