美帝總統選舉會點，無人知。人總係想預測未來做先知，但係今次選舉好詭秘。首先，一般如果係實力懸殊嘅選戰，即係阿甲贏硬阿乙果種，唔單只民調會睇到，連社交媒體、博客以至名嘴節目，都會一面倒指阿甲贏硬。呢個趨勢，亦會反映在民調數據上。即係話，民調咁樣講，條街又咁講，阿甲唔贏冇可能啦！點知今次真係奇怪，阿登嘅民調數據領先侵侵，一般都係十個百分點以上，但點解社媒名嘴又唔係一面倒撐阿登呢？奇怪。
第二，就係「十月驚奇」：即係指十月份會有驚天地泣鬼神的政治事件，將選情大逆轉。兩個星期前，「十月驚奇」就係阿登個仔，佢部電腦硬碟裡面嘅動作片同照片。一方面，呢啲珍藏片，唔似係合成或者搵人扮演嘅，主角應該都係阿登個仔，但係阿登陣營一粒聲都冇。另外，呢啲動作片響啲三四線嘅網媒同埋社媒首先發表，而唔係主流媒體，更唔係二三線既地方媒體或網媒，咁點解發放呢個選舉重磅炸彈嘅陣營，會咁樣做呢？以佢地陣營嘅網絡，拿去二三線媒體冇難度，點解去呢啲咁偏鋒小眾嘅媒體呢？
第三，講得出係「十月驚奇」嘅，必然係選舉殺著，大有不成功便成仁嘅最致命武器，勁過七種武器之首，而且一定會炸到對手變成深坑。但係情況真係奇怪：兩個星期以來，如果呢個致命武器咁勁，民調方面應該有一個黃金交叉，即使冇都好，侵同登嘅差距會大幅度嘅扭轉，但係又唔似囉，因為執筆為止，有啲州份嘅郁動不大，有啲差距係收窄咗，但想有個交叉又未見。最緊要嘅係，但凡選戰嘅重磅抹黑炸彈，做唔到大幅度拉近民調距離的話，抹黑對手嘅陣營應該收兵，盡量響呢幾日，整多幾個後備選戰攻勢，試下能不能力挽狂瀾。但係呢？侵侵支持者又唔見有新貨派，好似無以為繼咁樣，一啲唔似選戰最後終極一擊囉。
老土講句，既然呢次選戰，阿登民調應勝不似穩勝，侵侵民調落後唔似輸硬，任何一個正常嘅，好似我呢啲花生友，冇理由押注邊一個會贏，而應該思考，阿登贏的話，應該點樣反應，或者侵侵連任之後，局勢應該點樣處理。我唔係美帝選民，贏輸又關我乜事呢？
講返疫情。美帝嘅自暴自棄抗疫政策，害埋歐洲。依家原本想響年底前控制好疫情，來一個消費大反彈嘅聖誕節，應該會落空。歐洲部分人認為，肺炎中招又死，經濟下滑失業就會餓死，點都係死，而且中招的話，都係老人家死嘅機會大啲，中坑同青年機會少啲，點解唔開動經濟博一鋪呢？用社會達爾文主義角度講，社會都要汰弱留強，點解要青年餓死，而唔係老人家病死呢？今時今日，叢林法則先至係主流。
