跟G Dragon去中環食清湯韓牛腩麵
BIGBANG啱啱喺香港開完演唱會,相信一班VIP(粉絲)到依家都仲係意猶未盡!想延續呢份熱情,不妨跟住偶像腳步去搵食——連韓國天王G-Dragon(權志龍)、太陽(Taeyang)都要專程去食嘅韓牛腩麵,就係位於中環伊利近街附近嘅Moo-Lah。一入到去,牆上面個塊簽名牆已經夠晒吸睛,上面正正有太陽嘅相同埋親筆簽名!大家都知首爾馬場洞名店「Born & Bred」係頂級韓國牛肉嘅代名詞,呢間Moo-Lah正正就係佢嘅姊妹店:原來韓國老闆好鍾意廣東菜同香港飲食文化,專登搵嚟本地主廚合作,將韓國直送嘅頂級1++韓牛融入我哋最熟悉嘅港式雲吞同麵食入面。
Moo-Lah│同BIGBANG打咭兼食韓牛腩麵
好多朋友一聽到「頂級1++韓牛」,第一時間都會覺得「唔平喎」。老實講,佢哋嘅招牌菜「港式慢煮韓牛腩麵」賣$168一碗。你試下咁計:去隔籬九記牛腩食碗牛腩麵都要成嚿水,仲要俾老細黑面,依家加多幾十蚊,就可以食到由馬場洞自家團隊嚴選、24至36個月齡母牛嘅頂級韓牛,仲可以同BIGBANG成員太陽(張相同埋個簽名)打個靚卡兼朝聖,喺中環呢個地段嚟講,其實一啲都唔貴。
碗牛腩麵嘅靈魂,在於嗰鍋用咗超過40公斤牛骨、牛𦟌同牛尾,熬足48個鐘嘅濃湯。每碗麵只係精華提取60克,飲落牛味深厚得嚟帶點回甘,一啲都唔覺口渴;而主角韓牛腩入口即化,牛味極重,炆得腍身唔黐牙,「充滿港式牛腩影子,肉身卻是韓牛」,有驚喜。試埋「1++級韓牛煎餃子」($68):皮略厚煎得超香口,用上1++級韓牛做餡料,純粹牛味兼爆晒汁,必吃之一。
最近Moo-Lah仲新推咗幾款菜式,首推每日限量、全人手現包嘅「韓牛鮮蝦雲吞」($108):師傅好聰明地揀咗半肥瘦、油花均勻嘅韓牛牛肋條配上原隻大鮮蝦做餡,咬落去既有韓牛嘅濃郁肉香,又有鮮蝦嘅爽彈鮮甜,兩樣頂級食材聯袂領銜,相當有趣。
如果想食得惹味啲,可以試下走北方路線嘅「免治韓牛擔擔麵」($128):湯底用芝麻醬同花生醬調配,面頭淋上主廚秘製嘅辣椒油,入口先係麻醬香同免治牛肋條嘅油香,辣味再喺後面慢慢滲出嚟,香濃得嚟唔會死辣,仲加咗爽脆嘅傳統榨菜平衡返,層次感好豐富。麵食之外,不妨叫多客「牛肝菌春卷」($98):外皮炸到金黃脆卜卜,入面釀滿醇厚嘅牛𦟌同幽香嘅牛肝菌,極之鬆化,做小食一流。依家Moo-Lah仲首次推出午市套餐,可以一網打盡招牌麵食同春卷,想豪啲又可以試埋「特級韓牛肉眼」($288),咁就可以全方位感受到韓牛嘅威力。













