Pinterest預告2026「詩人感」成熱潮

Pinterest最近公布咗2026年嘅趨勢預測，當中「Poetcore(詩人核心)」被點名為未來大熱風格之一。由Kate Winslet、金泰梨到其他幾位氣質派明星，其實早就用日常穿搭，默默示範緊呢股詩人風。

詩人都可以變潮？究竟咩玩法？每年12月，Pinterest都會發表下一年嘅關鍵趨勢，範圍由時裝、美妝到家居設計都有，參考價值唔細——始終好多人都靠呢個平台搵靈感、存mood board。今年一堆關鍵字入面，除咗胸針、蕾絲之外，有個名特別搶眼又有啲神秘，就係「Poetcore」。

「Poetcore」由poet(詩人)加core(某種風格嘅核心)組成，簡單嚟講，就係一種帶住文青氣、藝術感、又有啲慵懶嘅穿搭美學。與其揀件熨到筆直嘅恤衫，不如著件有自然皺褶嘅亞麻上衣；與其深V精緻款，不如貼頸高領，乾淨俐落；連外套都係愈著愈軟、愈有「生活痕跡」先啱味。呢種風格，某程度就係將我哋暗暗欣賞嘅「掙扎中嘅藝術家」形象，變成一種日常時尚——冇大大隻 logo，取而代之係一份沉靜同內斂。手袋入面裝嘅，可能係舊筆記簿同鋼筆，而唔係iPad。

咁浪漫又有啲曖昧嘅詩人風，現實中點著？不如睇下幾位自帶詩意氣質嘅明星私服照，從佢哋日常造型入面搵靈感。

詩人風嘅重點，在於一種知性、細膩又唔刻意嘅感覺，而眼鏡絕對係加分神器。Cate Blanchett一向風格多變，但一戴上玳瑁框眼鏡，文青＋知識分子味即刻出晒嚟；Zoe Kravitz嘅樸素日常裝、Kate Winslet嘅啡色外套配寬鬆牛仔褲，再加對有啲污漬嘅麖皮鞋，只要配埋玳瑁眼鏡，成個詩人感即刻完整晒。

另一個關鍵，就係「自然舊感」。Poetcore唔追求一絲不苟，反而鍾意啲似穿咗好多年、自然褪色同起皺嘅單品。Alexa Chung嘅IG就係最佳示範：舊化皮褸、層層疊著嘅針織衫、皺巴巴嘅褲，同埋好似長期放喺衣櫃入面嘅素色大衣，全部都係詩人核心嘅精髓。

至於百想藝術大賞劇后金泰梨，本身已經自帶書卷味。佢最近IG照坐喺陽光灑入嘅窗邊，著住灰色安哥拉羊毛針織衫，素顏上鏡，自然又舒服。搶眼嘅紅色長褲配返低調上衣，多咗份調皮，但完全冇雕琢感——呢啲，就係詩人風最迷人嘅地方。