冇味級﹕鎮江肴肉$48 冇味之作，只得薑絲有味。
冇味級﹕蟹粉小籠包$48 湯汁少，偏腥，豬肉餡冇味。
冇味級﹕蒜泥白肉卷$48 又係冇味，中間捲住蘿蔔，不倫不類。
冇味級﹕鮮肉窩貼$28 冇味，死因與左邊相同。
冇味級﹕香芹手撕雞$48 睇樣以為辣嘢，點知不麻不辣，三不像。
冇味級﹕擔擔麵$36 麵身太腍，湯底好像很濃，入口卻係另一回事，花生味淡亦唔辣，懷念鑽石山詠藜園。
冇味級﹕牛肉餅$28 餡料太乾，冇肉汁。
冇味級﹕高力豆沙$32 味道普普通通，甜度適中。
有味級﹕杭式蔥油拌麵$30 全晚焦點，彈牙！蔥油份量同味道都恰到好處，好想食多碗，必吃！
有味級﹕豆腐馬蘭頭$38 些許草青味，略有麻油香，比起其他算OK。
有味級﹕脆皮素鵝$44 入口熱辣辣，餡料味道十足，冬菇尤其突出。
一般人選擇食肆有哪些條件？靠人龍靠報紙雜誌靠食評定係靠食家口碑？似乎靠人龍較為穩陣，咁多人排隊，唔會太差啩，倒未必。今次在朋友們極力游說下（朋友C：你睇幾多人，電台仲賣晒廣告添！試吓啦！）揀了apm王家沙，令我喺2011年率先中招。
王家沙這間apm分店開業約半年，係場內人氣食肆之一，門口當然係企滿人！入座大約要等半小時，尚算快。打開餐牌，價錢頗為經濟，大部分三、四十元，不過碟頭細，女士們啱晒。先叫多款冷盤試試，數分鐘後上桌，速度驚人，估計係預先做好後入雪櫃，否則怎可能一落單即到？大部分冷盤味道偏淡，隱約有陣雪藏味，是否我嗰碟雪得太久？其他菜式味道亦淡如開水，十款只得一兩款較為似樣，簡單來說可分為兩大級別：冇味級──雞肋啲friend，食之無味唔食又嘥，純粹逼胃部開工；有味級──唔係鹹濕嗰隻，而係菜名與味道相符及一般較有水準嘅都會列入此等級；有的話要劏雞還神！
點解會咁多人？究竟係大家味覺要求不同？定係抵食行先？不過就算再搵兩億食評家，喺電台大叫王家沙叫破喉嚨都冇用，我都唔會再幫襯。
饞咀，成日想食好嘢，卻一星期食足五日外賣飯盒嘅死肥仔。