北海道無添加海膽丼

近年香港被平價海膽攻佔，一開FB就會見到一大片黄甘甘嘅海膽飯呀手卷呀刺身呀刺激眼球，簡直係氾濫成災。其中一啲價錢勁平兼來歷不明，試問$25一個海膽手卷，邊有質素可言？一分錢一分貨，北海道海膽先係王道，我寧願喺香港食少啲，留quota去北海道食好啲。

其實新鮮嘅海膽經加工處理後極難保存，一般都會加入明礬去做防腐，因為海膽有九成都係水份，用明礬有脫水作用兼可保持完好狀態，但就會破壞海膽原有嘅甜味，有啲甚至會微微帶苦，所以想食百分百無添加嘅海膽，我就去咗北海道札幌嘅うにむらかみ(本店在函館)。

位於日本生命札幌ビル嘅うにむらかみ，本身在函館經營水產公司，做嘅正正係海膽物流批發，海膽每天新鮮直送，標榜百分百無添加，所以海膽丼定價不便宜，一碗賣4,000円(約80g海膽)，而且會按時節去唔同地方取貨，夏季去北端稚內嘅燒尻島、利尻島，秋季就去北方水域，春季去南部嘅函館，所有海膽均係北海道產，唔會好似香港某啲食店咁將產地撈亂晒，混淆食客。

1. 無添加海膽丼￥4,000─—用嘅係紫海膽，表面充滿光澤，呈鮮黃色，飽滿肉厚，就好似啱啱𢳂出嚟嘅雪糕咁，入口鮮甜即化，口感細滑清新，同蝦夷嗰種極具衝擊力嘅甘甜味道相反，而且丁點苦味化學味都冇，純淨感爆晒燈。

2. 活帆立貝刺身￥900、活鮑魚刺身￥2,000─—兩樣都超新鮮，鮑魚爽脆帆立貝勁甜，一入口就知係靚貨，如果唔想食刺身可以揀牛油燒。

3. 奶油焗海膽￥900─—招牌菜之一，用海膽殼裝住奶油白汁去烤焗，一個字：惹味。

4. 海膽大褔￥800─—第一次見到咁嘅組合，視覺攞滿分，汁帶少少甜味，加上海膽嘅天然味道，少少甜+少少鹹又+少少甜咁，非常得意嘅一道料理，食完你會永遠記得佢。

うにむらかみ
地址：北海道札幌市中央區北3西4丁目日本生命札幌大厦B1
電話：+81-11-290-1000
營業時間：
上午11：30~14：30
下午17：30~22：30