鵝肝蛋珍珠飯$98─賣相一絕，老闆會幫你撈勻，好細心，入口一朕鵝油＋蛋香，食落令味蕾有意想不到嘅滿足感 ，好味到不得了，只有豬油雞蛋撈飯可以媲美，我愛膽固醇！
蝦多士（兩件）$46─質素一般，頗脆口，有些許油饐味，就算用千島醬都冚唔到，唔使叫囉！
柚子酒煮花甲$88─兩樣嘢出奇地夾，我認為比清酒煮更好味！
麻辣一丁$48─配番茄粒青瓜粒，麻多過辣，嗜辣者一定不滿，不過可以加辣，價錢貴啲囉！
1.麻香田雞髀$58 ─超大件， 足足有半隻田雞size，咬落又脆又嫩又麻又辣，令味覺充滿層次感，創意十足嘅一道菜，必叫。
2.清湯蘿蔔牛腩$88─功夫餸，牛腩全部靚位，入口軟腍腍又甘香，蘿蔔冇渣，唯一挑剔係個湯略淡！
3.麻醬番茄$38─ 大大個，鋪滿麻醬， 作為前菜新鮮又清新，連伴碟嘅菜苗都唔放過！
4.七田純米吟釀$380─九州佐賀縣天山酒造旗下品牌七田，米香十足，滑口，好水源，飲得過。
連粵日居酒屋
香港地舖租貴到嘔，做飲食，除咗大集團，其餘小本經營嘅，好多賺埋唔夠交租，香港人食腦嘛，豬扒薄切凍飲多冰例湯溝水叉燒斬少嚿，慳慳埋埋仲頂得住，但一定冇客返轉頭，等執笠！
都話香港人食腦嘛，樓上舖租平，可以將慳番舖租嘅資源用嚟提升食物質素，一樣掂！位於銅鑼灣禮頓道2A號2樓嘅連粵日居酒屋就係一例，容納廿人左右嘅小店格局，主打的骰fusion粵菜配日本清酒，有賣點！打開餐牌，款式唔多，所有食物都係數十元（設最低消費每位$180），老闆Jareth原本係廣告人，喜歡煮，每日到街市買食材，然後同廚師一齊喺個超細嘅廚房用電爐煮，咁逼狹都煮得出十幾款菜式，算係有心。
小插曲：話說當日，某飲食周刊的兩億食評家剛啱介紹連粵日，批評食物普通，力數老闆唔識做生意好唔掂，當然冇減低我幫襯意欲，但係八卦㗎嘛，所以埋單時問老闆篇稿有冇影響生意，佢話即晚就有幾枱客打電話嚟取消訂位，都幾大影響，生意難做。以兩億食評家嘅金口妙筆，將你捧上天唔難，要你執笠更容易，但為踩而踩，死嘅人好冤枉喔！難道踩死人哋自己就會賣多兩張飛？
作為食客，我只關心好吃不好吃，人哋點做生意月蝕幾多，關我鬼事！
