江戶前的世界

以前我對於壽司嘅認知，只係一塊魚生加一嚿飯同埋隻碟識轉，That's it！但係人總要進步，尤其係食，自從N年前喺東京試過江戶前鮨店之後，彷彿踏進另一個世界不能自拔，自此每逢遊日都會盡量安排品嘗，但愈食得多，就愈發現自己對壽司一竅不通，呢嚿飯隱藏住無數嘅智慧、文化同味道嘅追求，例如活締技術、檜木雪櫃(只用冰唔用電嘅慎防抽乾魚鮮)、由舍利選用嘅米及調味、如何同魚鮮融合，將umami推向極緻，博大精深。
 

但想試晒東京江戶前最頂級幾個派系(久兵衛、次郎、すし匠、金坂等等)，實在困難，幸好金坂系嘅鮨さいとう(Sushi Saito)，喺四季開咗第一間分店，由Saito首徒主理，Kobayashi san無論刀工、魚鮮、壽司大小、形態及味道，都非常精準，動作流暢，而舍利溫度更加無與倫比，因為每次握壽司只會用一小盤飯，計算好魚鮮需配合不同溫度，每一個細節都非常講究；而當中拖羅、赤身、小肌、春子鯛及鯖魚特別驚喜，魚鮮經過熟成，味道特別濃郁。雖然食個晏要千六蚊落樓，但能夠一嘗金坂系壽司，值得。 
Sushi Saito香港店│中環金融街8號四季酒店45樓