Gen Y：成日想試下投資，但係相關嘅知識又唔夠，報紙上面嘅用字又好深，有時就只靠聽收音機學下嘢。其實青姐你覺得用咩途徑吸收財經知識最efficient﹖
青姐：聽多啲睇多啲青姐嘅節目應該係最簡單直接嘅方法，當然呢句係講笑兼講真，大眾傳媒嘅節目通常唔會故作高深，你可以同時集思廣益，看看誰的分析較仔細及到位。
坊間有光靠背誦指數或股價曾見過之水平位置之輩，他們只是一種慣常混淆視聽嘅較低層次瞞天過海方式，你必須留意當中真正從分析事物角度出發的成份，不同評論者嘅分析，即使係大家同樣針對同一個話題，也可以產生正反不同睇法，同一時間可以有人睇好有人睇淡，關鍵就在於你Buy唔Buy講嘅人所用作分析之論點，以及理據合唔合理，再啟發出你自己嘅一套睇法與結論。
Gen Y：青姐我想問下，一間公司點先可以上市㗎？點解我見到有啲上市公司好像大部分股份都唔放出來俾小股民買，咁個股票係咪唔買得過？嗰啲公司上市來做乜？
青姐：只要你嘅企業符合香港交易所上市條例要求嘅業務經營模式、行業監管法規及盈利紀錄要求，就可嘗試遞表申請於交易所掛牌上市。當然，獲批上市與否，要視乎港交所上市委員會及證監會，滿唔滿意擬申請上市公司提交的財務數據內容及相關要求。
近年唔少上市公司掛牌前已經搵咗風險投資基金、天使基金、甚至私募基金於業務仍未爭取上市前，以極廉宜的價格入股，企業有了資金水源自然就更快壯大，加快上市之路，小股民財力不足，當然喺公司上市後才可透過市場買入，雖然買貴咗，但勝在以交易所平台落盤，經營數據亦較透明兼有監管機構幫手隔過渣，較上市前隨時就算有大水喉都未必湊得大兼成功上市嘅風險低。
至於上市公司股票買唔買得過，始終要視乎個別公司業務及數據吸引力有幾大，及與市場上同行業競爭對手之估值比較。
上市目的難一概而論，善良嘅公司上市旨在與大家分享成果及集腋成裘，再把生意做大做強，立心不良企業則在上市前已賺夠趁市旺盡地一煲變相套現。
以上答問係從一個專為強化本地年輕一族理財概念而設的網站內「專家教路」欄目中，抽出嘅問題，更係由一位Gen Y提出，反映80後90後千禧後未必如大家想像中膚淺。
有統計預期到了2020年，佔人口24%之Gen Y將成就業市場的最大支柱，統計同時指74%Gen Y有既定投資目標，但27%對何謂正確理財觀念很模糊。
想分享理財的知識及對相關理論有疑問的Gen Y，不妨上hkyfi.com.hk參考。
逢周二、四刊出