不盡不實的報道害了業主以及買家

有老友話唔明白，明明報紙不斷報道有業主要蝕錢賣樓，賺錢的則鮮有所聞，理論上樓價指數應該下跌，但點解中原指數又會上升？

自從俄烏衝突之後，大家睇到雙方報道簡直是天南地北，認為總有一方是假新聞，其實大家俾假新聞三個字呃了，憑空捏造的才是假新聞，俄烏衝突，互有勝負，雙方報道有利自己的新聞，談不上是假新聞。

香港地產市場咁大，一定有人賺錢，有人蝕錢，傳媒知道讀者心態是鍾意睇人蝕錢，賺錢的報道很少會吸引讀者眼球，有人蝕錢就算唔報道都有很多人想知，所以，報紙集中報道蝕錢個案，賺錢的隻字不提，只可以話傳媒作出選擇性報道，不能話傳媒報道假新聞。

報紙集中報道那些蝕錢個案，除了害了那些打算賣樓的人，他們見到那些蝕錢交易，加上俾物業代理嚇兩嚇，唔好講蝕錢咁慘，有得賺都賺少很多。在另一方面，亦害了打算買樓的人，他們見到咁多蝕錢交易，點解自己要俾市價買樓，當那些人發覺報道是選擇性的時候，樓價已經升了一大截，真係喊都無謂。