業主要蝕讓賣樓，相信除了移民之外，最大原因是財困。(資料圖片)
有老友問我是否認識施永青，因為他發現在過去3個月，傳媒報道的減價蝕讓個案多不勝數，傳聞有約700個單位，理論上，中原指數應該大跌。不過，中原指數竟然紋風不動，所以，佢想請我問一問施永青，中原指數是否造假。
我話唔使問，一定沒有造假，就算有700個單位蝕讓又如何，3個月住宅單位的成交量應該有4、5千個，只有700個蝕讓，代表其他3、4千個不用蝕，甚至有部分高於市價成交。
不過，傳媒只是集中報道那些蝕讓個案，令到大家有一個錯覺，樓價正在下跌，相關指數一定會下跌。所以，當睇到中原指數保持穩定，便懷疑中原指數造假，老施有多少冤枉。
老友可能唔知道，傳媒是有多少鋤強扶弱心態，當報道有個別單位高於市價成交，代表有大量單位的成交價是低於市價，到時大家又會發覺點解有業主賺大錢，樓市反而下跌。
至於現在的業主點解要蝕讓賣樓，除了移民之外，最大原因是財困，不過，他們不會承認財困，只會話睇淡後市。我唔敢叫人現在賣樓，否則在通關之後，樓市一個大翻身，我一定會俾人鬧死。
作者為紀惠集團副主席及行政總裁
