星辰昨收報0.71元。
星辰通信(1155)市值得5.5億銀，嚟緊2014年成績單，若果有盈喜，細細粒，好易彈。
星辰主打無線電信覆蓋系統設備工程，兼開拓埋數字對講機瓣數。食住祖國4G開發，星辰由2013年上半年見紅1,333萬銀(人仔，下同)，轉為上年上半年盈利2,844萬銀，兼超過2013年全年盈利710萬銀，已經有半年靚仔業績打底。又阿爺除咗喺2013年尾，發放TD-LTE牌照，上年中，亦批准混合組網TD-LTE/FD-DLTE。再喺上年10月，中國移動(941)提前啟動TD-LTE網絡第三期建站工程。再講，上半年時，星辰毛利率升到近26%，比2013年上半年24%，有唔錯改善。
諗到係，隨住4G基建快馬加鞭，星辰主打瓣數，keep住受惠，呢邊生意額做大咗，另一邊毛利率有改善，照計，下半年打後，業務一樣有睇頭。又星辰喺2013年減值7,600萬元，唔計呢個撇減影響，實際盈利係上到8,170萬元，嚟緊2014年全年成績單，冇咗呢個撇減因素，加埋半年度強力墊底因素，已經有得博盈喜。
星辰現價(0.71港元)貼實8年低位，比07年時4港元，累跌咗80%過外，得0.29倍市帳率(PB)，場內主打4G周邊業務嘅，冇乜邊隻PB，有星辰咁殘咁抵。冷灶煲星辰，博嚟緊派嘅2014年成績單有盈喜，市帳率喺咁意收窄到0.4倍計數，星辰都要升37%，到1港元水位。
作者為中細價股專家