有朋友問，點解你個名叫金融Loser而唔叫Winner，查實好簡單，好多人成日誇誇其詞講到自己喺股市幾叻幾掂，吹到股神上晒身；但以我喺金融界打滾廿年，見唔少股民輸多贏少，就算有人贏到錢，大部份係兩個字－「好彩」，能夠Beat the market嘅唔係冇，但就寥寥可數。
反之失敗嘅人居多，但好多人冇去做檢討，結果就一再犯錯。《蘋果日報》老闆肥老黎曾經話，佢請人唔鍾意請啲成功人士，反而專請啲失敗者，點解？因為要借助佢哋啲經驗，咁先可以避免犯錯。
一勝九敗
姑勿論佢係真心定係扮嘢，某程度我同意呢個講法，別人成功好風光，但可能睇漏咗佢曾經失敗咗無數次；一如Uniqlo老細柳井正，就係經歷無數失敗，最終先踏上成功路，大家不妨睇睇佢本著作《一勝九敗》，就知失敗經驗幾重要。
好似上周個市大旺，港交所(0388)曾經一日升五十蚊，即刻有人又自吹自擂，話早喺百零蚊已經睇到，佢仲大大聲話好快見五百蚊。港交所幾時變成大牛股我唔夠膽講，但每逢港股大升，市場總有啲分析員會大發偉論，事關你估個價唔夠勁，又點會吸引到眼球。好似港交所今天係兩百八十蚊，如果你話三百，啲人會話：「冇乜嘢啫！」但你話五百，就會有人睇，起嗎會問：「係咪呀。」
但經驗話俾我知，每當有人咁做時，個市都去到接近玩完，又或有個大調整，一如０八年有人話港交所見五百，又有人話神華(1088)值一百，最終仲倒跌咗成半添！
湯文亮睇錯市？
講起呢招，雖然未必好多人會信，但你唔信還唔信，都會攞嚟睇，好似樓市炒家湯文亮咁，二月時寫咗篇文章話細價樓會喺三個月內爆破，結果點？就嚟都五月，細價樓仍然穩如泰山，倘若你信佢而喺早前賣樓，今日都唔知入返市好定等爆破好，但唔好理，相信唔少人都睇個篇文章。
講咗咁多嘢，其實係想跟大家講，啲好誇張嘅言論一出，就要逆向思維。今年個市咁大起大落，估港交所五百蚊都未必會搶到點激率，遲啲如果個市繼續好，就好可能有人走出嚟話：「港所交值一千蚊。」咁呢個時候大家就要小心喇。