港股呢排真係癲癲哋，揸住隻「一股都不能沽」嘅港交所(388)應該無死，假如行政總裁李小加咁積極變革都要被離棄，個市肯定真係受制雙頂無厘神氣。由無嘢好炒到無所不炒，練功練至走火入魔，總之一眾大小投行經紀行難得今年以嚟同時出現新股IPO大混戰、大小併購火辣辣、加埋配股供股抽水發CB大潮，幾大就幾大、燒賣就燒賣，最緊要唔好俾佢停，唔好俾佢跌，咁樣今年就食番鋪尾胡袋袋平安。
照咁睇，就算阿爺點樣打壓樓市不手軟，或者要內地銀行在巴塞爾III實施前，提早達標超標完成任務，仲要whiter than white，明知A股唔行，日圓要靠干預吊住條命，再加上金價上升，都變得無意義，除了用「經紀要開飯」五字真言道破港股走勢外，根本就唔知可以點樣理解。
如此風景，仍然要緊貼市場唔放過每一個機會嘅勇者、戰士，只可以一係就走入去跟佢鬥癲；除非閣下可以不為所動當視而不見袖手旁觀，不為眼前假象所瞞騙。當市場小散戶仍未瘋狂之前，股市係無咁輕易罷休嘅，皆因第一批攞得晒近排市場有如水銀瀉地貨源嘅都肯定唔係善男信女，因此市場必須要用時間換取小散戶嘅信心。
首先要呢班終日踎股票行癡癡呆呆坐埋一枱嘅小散戶，經歷一輪無乜料到，唔上唔落唔知炒乜嘅日子，然後要佢哋一個二個形同被鎖咗入房兼餓咗三五七日，甫見門口個窿突然有碟叉燒飯送入嚟，即唔理三七廿一起勢咁搶食，正式係要掃起個市搞好氣氛，唔怕你癡唔怕你呆，至怕你唔來，正常情況當個陣擺好晒，無幾多個小散戶真係可以不為所動。
講開經紀要開飯，聽講星期二當晚，港交所與各大券商協會及經紀團體開會協商後，一致同意港股開市時間與A股同步，其實平時朝頭早九點半，大部分經紀都慣常坐定定幫客入競價U盤，所以開市唔難搞。然而，據說下午開市時間卻出現兩套方案，市場最快都要等下個禮拜中秋節前後諮詢文件出台再定奪。
現時雙方最大分歧在於早上收市設定為12點鐘；中午兩個鐘嘅午餐時間會縮短1個鐘，以配合內地下午1點鐘開始的午後交易時段。業界對有關建議存在爭議，認為午休時間縮短至1個鐘，將會加重工作負擔，更會影響經紀與客戶利用午餐時間會面。
針對上述方案，有反建議提議下午1點半才開始交易，即午休時間為個半鐘。預期最終將一人行一步。當然，你問股壇長毛，佢當然會話，最好取消埋食飯時間，因為佢晏晝根本唔使開飯，佢係食三文治嘅，市場最關注到時若果真正實行縮短午飯時間，大家樂和大快活肯定係大贏家，因為個個要買外賣是也，茶餐廳與粥麵檔嘅外賣肯定一樣做唔切，唔係證券商嘅文職員工到酒樓食晏搵位肯定話咁易。 逢周二、四刊出