警方一直呼籲小心電話騙案。(資料圖片)
我係一個經常遊蕩在Facebook的網民，之前明明有周刊踢爆過一些買足彩博彩貼士的騙局，就是那些打著旗號話跟貼士買波會大賭變李嘉誠、會發大達那種。豈料真係野火燒不盡，春風吹又生。呢期Facebook又愈來愈多呢類廣告，仲要係俾錢買的sponsored post。 這一類騙局本質大家都明白，就是買波分兩門，一門叫人買莊，另一門叫人買閒，結果總會是但中一門，賣貼士的就賺所謂「貼士費用」，圍骰通殺。由於總會有人輸，如個客易哄、銷售技巧又夠高，分分鐘可翻撻再哄佢俾多次錢。如有人不服氣就永遠踢出局，然後永遠消失找不到他。有時貼士會好運地買中，之後就擺上網做marketing，再搵打手催谷下，有時又炫富，都係為了哄人下海。大致原理應該是這樣，當然實行會再複雜些同多一些變化。 這類騙局入場費不高，運作和道具要求簡單，由於economic rent太大，所以好多人都來爭食。簡單點講，即係瘦田無人耕，耕開有人爭。明明個騙局原理咁簡單，點解會有人中招，同埋咁viral？
騙局設計同運作都係從成本、利益入手考慮，很合經濟邏輯的。不論尼日利亞電郵騙案、順豐電話騙案定博彩貼士騙局，要做大規模唔一定要好似龐氏騙局、傳銷騙案咁針對一個大critical mass，如操作成本夠低，有時定點攻擊某幾個傻的、易中招的，做小眾市場足以維皮。我當香港人的智力係根據一個統計學distribution去排，一般正常智力的通常係最集中，呢班人有足夠能力了解騙局本質，故不會是行騙者目標群，行騙者的目標是fat tail那班最笨的人，只要中一個，食水夠深，就足夠回本。好似尼日利亞電郵騙案咁，可能用algorithm傳送大量電郵，但marginal cost係0；順豐騙案在大陸搞，成本也不高，盡是膽正命平的亡命之徒；博彩貼士Facebook推post，成本也有限，故不停去搵人將資料傳送俾人都係一個selection process，目的未必打大市場，很多時只為一、兩個特別小眾易哄易呃的人。大陸最近好多吸金騙案，甚至吸到有錢來香港買殼，如「中晉系」咁，最近被公安拉了才東窗事發。殺頭生意有人做，虧本生意無人做，真係至理名言。
作者為九十後財經傳媒人、粗讀經濟學的偽文青 https://www.facebook.com/muddydirtywater
逢周一至五刊出