熱刺近年無論點變，焦點同命運都繫於一對前鋒哈利卡尼同孫興民；不過現今球壇，重整體輕個人，C朗、美斯也難隻手遮天，擁有呢對被譽為英超史上最厲害嘅攻擊「孖寶」，熱刺仍無盃緣，下屆爭Big Six又要預埋紐卡素，球會死攬呢對「孖寶」唔係好事。哈利卡尼季前過檔曼城撻Q，今屆表現跌得幾明顯；但問題未浮面只因「老孫」更搶鏡，但奇怪近年冇乜大會吼呢位南韓人，人工只係賺緊周薪14萬英鎊，以曼聯今屆全隊人工薪酬表計，老孫不入十大，仲少過15萬英鎊嘅守將勞基梳爾。再數「老孫」今屆20個聯賽入波，幫熱刺錄得12勝2和2負，鬥曼城利記聯賽共4戰入3球兼不敗，打大賽嘅突擊力更強。老孫呢位全能雙槍將，肯離開好拍檔卡尼，轉型打相對體力要求冇咁高兼更吸睛嘅「9號」位，發展或更好。佢暫時只係落後射手榜前領嘅紅軍穆罕默德沙拿2球，今季餘下鬥阿仙奴、般尼及諾域治；沙拿或要留力打歐聯，場場去到盡嘅老孫，有力創歷史成為英超神射手，屆時身價會推向頂峰。
