Wenger NEVER out
如果我講雲加，可能好多讀者都會覺得我要懷古，但係你睇埋落去，應該覺得呢個故都幾值得溫下。我成日話無論幾時開始鍾意阿仙奴嘅球迷，都應該興幸球隊曾經有一個如此睿智嘅領隊，佢嘅計劃裡面唔係只得自己在任時後嘅安排，而係顧及球會嘅長遠發展。2012年，雲加喺一次簡報會後，同意球隊收購StatDNA，一間體育數據分析公司，運用數據去輔助球探，方便追蹤更多球員。前利物浦數據部門嘅主管Ian Graham講過，阿仙奴喺使用數據分析嚟輔助收購球員係英超數一數二早嘅，時至今日，當每一間英超球會都有自家數據分析部門嘅時候，阿仙奴因為雲加足足早咗10年已經起步。
有數據當然唔係等於有冠軍，數據都有佢嘅盲點。舉個例，一個橫傳，傳球成功率一定比向前俾波，試圖撕破對方防守嘅傳球容易，令「傳球成功率」變成有水分嘅統計。但係隨AI普及並融入到體育數據分析，而家數據已經可以又快又準，仔細咁劃分到「喺球場邊個位置嘅傳球成功率有幾高」，彌補統計嘅不足同盲點，而且大大增加咗數據喺收購、操練、戰術制定甚至預防傷患等範疇嘅重要性。咁樣睇返轉頭，雲爺爺當年真係好有眼光。
近日雲爺爺同大帝亨利一齊捧另一位愛徒費比加斯場，去咗睇意甲Como嘅比賽之外，仲打算推動關於「越位」嘅球例修改。如果真係成功，受益人應該係20年前嘅恩沙基(笑)。懷古完畢，今個星期預備睇唔係深夜先開波嘅西班牙國家打吡。