季初傷兵多非壞事

英超今屆特別多傷兵，據報暫時約有100人，相當誇張；只見季初階段，唔少新仔出頭。最有勇氣當然首推「傷兵之王」紐卡素，喺歐聯又要陷入苦戰，賀維大膽用新人一樣唔輸蝕。再以上輪英超為例，粗略計多達10人喺今屆聯賽「開齋」入波；最明顯係曼聯雪藏貨安東尼馬迪爾，儲夠啖火，作客愛華頓入波兼助攻，但如果唔係「坦克」成手傷兵，連同勇冠全場嘅新人曼奴、入倒掛嘅阿歷真奴加拿祖，唔會係呢場大捷嘅主角。季初傷兵多，未必係壞事，英超激到已無獨大之師；呢班已受過大戰洗禮嘅二線兵，季中後隨時係爭霸奇兵。
 

好奇怪，歐聯已出線嘅曼城，上仗俾利物浦逼和，哥帥全場冇換人，失分有啲輕敵同托大，唔通想營造季尾爭霸高潮？佢徒弟、阿仙奴主帥阿迪達同樣唔鍾意輪換，啱啱嗰場「焗用」雪到硬晒嘅英格蘭門將蘭斯達爾，幾乎鑄成大錯；兵工廠喺歐聯出線亦冇乜走雞，明晚主場鬥西維爾，應該俾多次機會Rambo打返起信心，隊波今屆可「雙龍」出海。