荷甲從來強弱懸殊，阿積士(Ajax)、燕豪芬同飛燕諾鼎立，難得今屆阿爾克馬爾(AZ)做異軍，聯賽追得興起，拍住班霸阿積士鬥入直路；一場新冠肺炎，荷甲先腰斬，淪為歐洲小聯賽，異議人其實唔多。阿積士對上10屆聯賽「非一即二」，加上呢兩年新星成熟又被歐洲列強拆骨，收取大量現金，今屆無冠無大損失。連埋薛耶治準備去車仔，加上去夏離隊嘅馬菲斯迪歷特、法蘭基迪莊及多爾貝治，阿積士執逾2億歐元；但停擺前6戰4敗包括歐霸出局，走勢已老。
相反AZ今季半數主力青訓出身，小虎隊季尾冒勇，年輕球員最緊要有得踢，進步會快；「山寨王」阿積士能唔能夠喺暑假揼本吸納到優質新兵補位，又有幾多好貨色肯去9月先開嘅荷甲，會成為荷甲來屆「兩A」再爭嘅關鍵。快踏入5月，五大聯賽包括英超同意甲正計劃復操，甚至德甲已為閉門復賽做好準備；荷蘭足球常走到最前，但今次「搶閘」腰斬，對來屆聯賽發展同下年國家隊喺歐國盃嘅表現，可能埋下一個深水炸彈。