阿積士揸極唔乾

論近代歐洲球壇嘅買賣策略同新星培訓，冇人唔服荷甲班霸阿積士。以著名足球網站《transfermarket.com 》作粗略統計，該隊對上一次失落荷甲錦標即2017/18年球季後，翌屆先肯大破慳囊，喺英超簽得守將戴利白蘭特及攻擊好手杜辛泰迪治，錄得轉會費淨負數；結果入貨眼光好，即回正軌，聯同上屆荷甲4連霸，仲有兩屆打入歐聯淘汰賽，又唔怕主力持續流失，財源滾滾。最奇怪無論早幾年嘅金童中堅馬菲斯迪歷特、法蘭基迪莊；之後雲迪碧克、薛耶治等，冇一人離開阿積士後喺歐洲富豪球會產生重大影響力，但曼聯今夏一直搶緊法蘭基迪莊，又心繫阿積士現役嘅南美兵利辛度馬天尼斯同安東尼馬菲奧斯，打包價仲要逾1億英鎊，但近年荷甲兵在曼聯失敗居多，又睇下新帥坦哈格嘅執著可唔可以破數據。反而阿積士揸極唔乾，一來國內對手燕豪芬同飛燕諾都冇力留住主將，二來單係今夏放走見晒底嘅中鋒施巴斯坦賀拿，用同價從熱刺簽回年輕4年嘅荷蘭射手貝雲積補上，呢類神操作，喺荷甲已係殺雞用牛刀。