哥倫比亞前鋒卡路士巴卡好大機會離開AC米蘭，教頭蒙迪拿表明，佢唔俾巴卡出戰國際冠軍盃對拜仁及歐霸盃外圍賽，係為轉會交易而鋪路。咁講法，巴卡離隊只係遲早嘅事，個人認為，佢近兩季喺AC嘅表現只係不過不失，遠遠不及喺西維爾嗰陣咁大熟大勇，以佢實力絕對唔愁冇班落，但要加盟大球會機會就較微。
另一邊廂，巴塞中堅馬斯真蘭奴未來有意轉戰美職，呢位阿根廷後衛透露，曾與不少美職聯球員傾過，認為喺美國踢波感覺唔錯，會係退休前一個好選擇。33歲嘅馬斯真蘭奴如果可以保持狀態，應該仲有一、兩年貨仔賣，倘若轉戰美職聯，論實力及經驗，絕對可應付自如。