「神救」不了迪基亞
西班牙門將迪基亞效力曼聯12載，由費爵爺到現時嘅「坦克」sir，服侍過七大波士；2017年鬥阿仙奴平英超紀錄、全場14次「神救」嘅光輝歲月，成為紅魔近年一道強大護身符，但目前續約曼聯未見明顯進度，紅魔歲月是否已寫下句號？
迪希亞腳下功夫成弱項
迪基亞過去3季賺到周薪37萬5千英鎊，為全球最搵錢嘅「神龍」，依家先係32歲，頂級門將嘅黃金期。但上屆英超再攞「金手套」都只係講緊單場不失球，數字唔多全面，其實已超過一年半冇入選國家隊，喺曼聯仲有幾場大戰出現失誤，包括英足盃決賽輸俾曼城，續約拖到季後先傾嘅主因。「坦克」sir跟大潮流，要由門將起從後場組織攻勢，迪基亞弱項；何況荷蘭波士一向唔怕用新人門將，雲高爾喺世盃都用冇人識嘅路柏治擔正，所以曼聯未必係重金簽國米奧拿拿呢位紀律有問題嘅非洲人，「坦克」長遠都會搵返荷甲自己友。
迪基亞與曼聯約滿，雙方仍未就續約達成協議。
2021年歐聯最佳門將、31歲嘅艾度亞文迪，都啱啱由車仔轉去沙特掘金，3年合約周薪19萬英鎊，大約迪基亞之前嘅一半，已經好筍；以後者嘅名氣又唔使轉會費都有機會賺到，問題佢新婚不久，就要兩公婆遠去中東謀生，對呢位生於馬德里嘅西班牙人，一啲都唔易。