法國球王講多無謂
今屆歐洲轉會市場重開不久，因沙特早刮搶人風暴，出入暢旺；最新焦點當然係法國球王基利安麥巴比喺PSG嘅前途，大熟之年當然唔會玩「沙」，究竟面前3條路，走人、續約或留多一年，佢又有冇得揀？
根據歐洲足協最新公布，英超居首，法甲喺歐洲聯賽排名已跌至第7，差過荷甲同比甲，只因PSG獨大又唔叻；而計歐洲著名網站 transfermarkt.com統計，世界百大最有價值球會，PSG現排第4，落後曼城、阿仙奴同皇馬。
PSG中東老闆同麥巴比打口水戰之餘，近期狂搶人幫新帥安歷基造勢；雖然當中不乏當打好手，又有烏拉圭防中新星烏加迪同南韓「美斯」李康仁加盟，要繼續贏法甲當然冇難度，但將帥配搭騎呢，更唔似有歐聯冠軍相。麥巴比開到口話幫唔到呢支玩「分裂」球隊，24歲計佢衝刺型踢法已踏入比賽生涯高峰，提早走人，各取所需無謂嘥大家時間。要再提升自身戰力，他朝正名做新球王，另一兩強玩晒嘅西甲未必係好地方；英超幾支強隊嘅水準同財力，足以馬上滿足呢位法國人嘅條件同PSG要求嘅天價轉會費，肯跳出安舒區，絕對有得揀！