英超轉會市場仲有一星期關門，有約在身又有離心嘅球員，未必著急到好似水晶宮主將伊比爾治伊斯，直接打電話俾心儀球隊嘅波士，成就一個有愛嘅轉會故事。關門前大部分個案都係糾纏、講價，甚至反面；最忌「雙輸」留隊白支人工，浪費資源，識買唔識放。
哥迪奧拿係咪教波功力到頂？未知。但貴為英超現役最長壽領隊，總有佢長做長有嘅方法。當潮流要每隊2、30名精銳應付一周三賽，佢近日講過最唔想就係咁樣，亦唔想訓練24名球員，但留低5、6人喺曼徹斯特；仲同球會講過唔要big squad，寧願唔撈，幾有霸氣。啱啱俾佢借走嘅基亞利殊，喺愛華頓啱啱交出2次贏波助攻，30萬英鎊周薪，曼城肯孭四分之一，呢單刁暫時三贏；又唔使留低「大哥級」球員喺雪櫃兼影響隊友。
究竟紐記星級「叛兵」伊沙克去唔去得成紅軍？哥帥鄰居艾摩廉，最後又可唔可以放走大量棄兵，為紅魔行出一條新路？疑人不用，雖然哥帥都試過放錯高爾彭馬俾車仔，但當時車仔嘅主帥普捷天奴識用咩？