英超炒夠未

英超賽果一向難估，唯獨炒領隊事前易中得多。今屆英超炒人數目之多已破紀錄，英國領隊連埋威爾斯嘅谷巴同蘇格蘭嘅莫耶斯，淨返6個；咁啱提呢兩位已搖身變成下位被炒領隊嘅兩大熱門，球尾紀錄會繼續破。我估莫耶斯下一位被炒，「槌仔幫」小勝修咸頓低水準演出，主場都攻唔起包尾隊，只靠死球食胡；又要分心踢無謂歐協聯，未來3場英超包括鬥紐卡素、富咸同阿仙奴唔易再贏，暫係降班冷門但隱藏重大危機。隊長迪格蘭賴斯季尾等走人跳槽大會，門將法比安斯基老退成日傷，防線冇佢好危；班波前景一般，莫帥頂盡捱埋今季。

呢班英國領隊今屆大部分有一共通點，全部教嘅球隊火力低迷，平均1場英超入唔夠1球，唔識射「3分波」，所以多要在下游掙扎；就算係明日之星艾迪賀維教緊紐卡素，啱啱場波都係靠主場高空波簡單足球炸死曼聯。紐記防守喺英超No.1大超班，但當沙特班主下屆野心勃勃進軍歐洲時，賀維嘅進攻套路可唔可以幫呢支油元球會升呢，就係佢嘅護身或者催命符。