英超炒帥風暴快到

英超開季後，罕有咁去到上月先炒咗下游嘅錫菲聯同森林兩隊嘅前波士；估計下半季，呢股炒帥大風暴，將全面覆蓋上中下游球隊。強隊中，除咗曼聯「坦克」，紐卡素嘅艾迪賀維更危，領軍極速「升呢」後換來大跌watt；近10場連互射12碼輸足8場，聯賽跌落中游，月尾嘅英足盃鬥富咸，變得關鍵。只見兵荒馬亂又多傷兵，紐記仲勁傳會放走後防通天老倌查比亞同後備射手哥林威爾遜，沙特富貴班主似為新波士上場鋪路。中游，最危係水晶宮鶴臣爺爺，啱啱吞阿仙奴5蛋，俾佢哋球迷當場拉橫額喺全球球迷面前落面，其實大敗主因係輸休息時間；成隊波最值錢嘅土炮伊比爾治伊斯，隨時俾大會撬走，冇埋佢，鶴臣可以安心退休，水晶宮今屆要保住已連續11屆喺英超嘅金漆招牌，唔易。下游，般尼嘅高柏尼走唔甩居多，以高章踢法教英超護級隊從來都係大忌；相反蚊型班盧頓用死球高空轟炸，先係生存嘅王道，隊型、治軍理念清晰得多，加上新一股球會扣分風暴正在醞釀，今屆英超降班3隊唔一定全係升班馬。