絕殺嘅真義
上周六英超踏入90分鐘或以後，出現8個入波，是史上單日最多補時入波嘅一天；連同阿仙奴周日反勝紐卡素，上輪頭9場比賽出現3場絕殺贏波。再仔細啲睇，上周六8個入波，5個係後備球員取得；阿仙奴絕殺前扳平球，亦係由後備入替嘅米基爾美連奴87分鐘取得，以超強後備力驚險鎮壓聖占士球場。
自從足球世界加到5個後備出場名額，幾乎盡收天下兵器嘅英超，感覺上更激，強隊冇因改例大佔上風，賓福特、白禮頓同水晶宮同一輪比賽，齊齊擊倒傳統Big Six球隊，包尾狼隊幾乎作客贏熱刺。英超平均每場入球，計到周日喺五大聯賽排尾二，得2.63球；計76-90+分鐘嘅入波比例亦輸緊畀法甲，唔係癲鳳鬥狂龍。只係大家水頭充足，聯賽水平愈拉愈高同接近，傳統Big Six上季開始已瓦解，呢個唔係壞事。利物浦同阿仙奴去到81-90+分鐘，踢咗6場共入10球，呢個係後備精兵多、爭勝最強後盾嘅明證；阿仙奴仲啱啱變成英超奪標大熱，但點會咁易坐穩，英超爭霸似過山車，下一隊上前挑戰嘅係傷兵漸少嘅藍月。