上季鮮有上陣機會嘅賓特拿，已表明希望盡快離開阿仙奴，另覓新發展。兵工廠日前已簽入修咸頓翼鋒阿歷士張伯倫，意味著呢位丹麥前鋒來季嘅上陣機會只會更少，佢有離隊之心亦無可厚非。
早前曾經傳過多蒙特、史篤城及賓菲加都對賓特拿有興趣，但兵工廠要求轉會費太高，令交易無法達成。賓特拿早前接受訪問時話，希望加盟一間可以開心咁踢波嘅球會，因為每日過得高高興興，對佢嚟講非常重要。另一邊廂嘅丹麥國家隊教練奧臣亦建議賓特拿盡快轉會，唔好留喺兵工廠浪費青春。
23歲嘅賓特拿，04年加盟阿仙奴青年軍，06年曾外借到伯明翰，効力期間有不俗表現，07年由兵工廠回收，簽下5年新約，但係佢近年表現未如理想，以致被貶為隊中嘅邊緣人，唔走都唔得啦。