羅淑佩獻唱經典粵曲，獲全場拍掌歡呼(TVB截圖)
文化體育及旅遊局局長羅淑佩興趣多籮籮，鍾意煮飯仔、潛水、追星。原來佢仲識得唱粵曲！噚晚喺演藝學院40周年校慶晚宴獻唱經典粵曲「昭君出塞」，收獲全場拍掌歡呼。
唱足5分鐘
羅淑佩喺演藝學院校慶晚宴除咗擔任主禮嘉賓，仲好畀面做埋表演嘉賓。由影片可見，羅淑佩唔係唱兩句草草了事，而係唱足5分鐘，喺700人面前公開獻唱一啲都冇怯場。羅淑佩事後喺社交網站話係獻醜，佢感謝戲曲學院院長劉國瑛同樂團同學們嘅指導、耐心同包容，今次準備演出令佢有機會一窺學院嘅專業同認真，亦欣慰粵劇文化可以傳承落去。
戲曲學院院長劉國瑛透露羅淑佩只係用咗兩個半鐘練習，大讚佢對粵劇好有天份。座上客之一嘅前助理廣播處長張文新就大讚羅淑佩勇氣可嘉。
