邊隊球星最辛苦
球圈搵錢至上，休季期越嚟越短，正如阿仙奴主帥達Sir指出球員唔可能再有4至6星期，瞓喺沙灘床上搽太陽油曬日光浴咁寫意，如今做球員係要長期保持最佳狀態。阿仙奴還好，冇份踢夏天嘅世界冠軍球會，但入選三獅嘅「飯仔」、沙卡同史基利，仲要備戰國家隊兩場無謂波鬥安道爾同塞內加爾，先有得歇暑，最遲7月中都要返球會報到，備戰季前亞洲之旅。做曼聯球星都好，頂埋兩場季後亞洲賽替球會幫補使費，下季冇份踢歐洲賽，有足夠時間叉電再嚟。睇返紐卡素小別一季，都踢得返歐聯；意甲拿玻里更攞返聯賽冠軍，踢波逐季計，底厚嘅紅魔下季咪睇小。
邊支強隊嘅球星最勞碌？應該係入咗歐聯決賽嘅PSG，踢完周末場硬仗，佢哋唔少法葡球星要趕住報到，打歐國聯爭霸戰；之後6月中又要遠征美國打3場世冠盃，入到決賽要踢到7月中。法甲新季8月中開鑼，好在PSG國內大超班，讓你半程都冇有怕；反而英超代表曼城同車仔，用乜嘢心態對待呢個金錢至上嘅summer league，又不損球隊季初元氣，最考哥帥兩師徒功力。