制霸背後

唔經唔覺英超絕大部分球隊，準備進入單位數嘅聯賽要踢，今屆精彩在於呢刻冇邊隊可hea踢等收爐。尤其9支全數打入歐戰3盃16強，已成歐洲制霸嘅英超軍團，出擊下周中歐洲大戰前，喺英足盃16強又有5隊係歐戰分子；加埋今晚起要踢季內最後一個周中英超快車，制霸成員部署稍一不慎，分分鐘出現骨牌式效應，一無所有。

制霸9強中最尷尬係熱刺同森林，聯賽搶分保命同樣重要，只要排名喺佢哋後面、尾三嘅韋斯咸多贏1場波，足以令護級戰大亂，大大影響「熱森」踢歐洲賽嘅心情。9強中最有決心爭盃一定係聯賽中游嘅紐卡素，嚟緊賽程瘋狂，英超鬥曼聯、英足盃鬥曼城、之後歐聯兩鬥巴塞，期間又要喺英超鬥車路士，本月可決定紐記生死；只係傷咗攻中般奴古馬雷斯，前鋒又個個啞火，地位唔穩嘅領隊艾迪賀維，夠膽棄英超主攻兩盃都未必有本錢。

明晚季內踢咗45場波嘅紐卡素，喺冇晒威力嘅主場，鬥唔使踢歐洲賽、今季只係踢咗30場波嘅紅魔，就會睇清楚雙方嘅決心、銳氣嘅分野。