二十五年前的今日，歷歷在目，當日相當悲憤，就像其他香港人一樣，翌日就去大遊行。這些過程，過去我一些文章已經講過，不再重複。
今年的遊行，從電視上看到，似乎人數較少。但相信今晚出席的人數，應該不會太少，畢竟這是一件大是大非的問題，想悼念的，自自然然就會出席，不想悼念的，就不會出現，至於在集會旁邊搞搞震的建制激進團體，老毛話齋，小爬蟲而已，唔使花時間應對。
二十五年後的今日，無論是甚麼派別，無論在甚麼地方，無論人在哪裡，只要想悼念，就無需一定要去維園，我素來覺得，悼念可以是非常公開的事情，也可以是非常私人的事情，十幾年來，我無去維園，因為個人唔係好喜歡及接受集體悼念這回事。在家裡，關了燈，點起蠟燭，非常私人，也好私隱，追思為民主犧牲的義士，相信效果也一樣。
只是，現在六四的討論，要平反六四，「平反」暗示響現政權底下作出呢個政治舉措 ，以依家政權之操作，已經唔可能，亦唔真實。所以，響二十五年的今日，可以思考番當年呢件慘案，點樣深入各階層，以及如何同日後香港民主運動連結之方向。
回看過往香港政治發展，六四係一個分水嶺。之前好多人覺得，政治係上層人士的事情，唔關我事，未來97年之後嘅政治唔係好關心。有人選擇移民，甚至已經移緊民。六四之後，願意走嘅會走得好快，唔願意或冇能力走嘅，就會留低響度，亦會開始思考，究竟香港點樣走落去。既然聯合聲明已經簽咗，要改變香港之國際地位已經不可能，香港政治該往何處去呢？於是，部分(都唔係全部，至少醒咗好多人)慢慢關心政治起來，關心香港自身的前途。
亦因為咁，就奠下咗往後選舉發展之基礎。換句話說。痛心疾首之後，就會沉澱再發展，呢個過程值得思考，需要再一步探討一下，睇睇呢個中國因素點樣推動香港之本土民主運動。呢個部分，過往書寫得多嘅，就係民主派大老之心路歷程。但實際上，值得書寫嘅唔係呢班大老，而係一般平民老百姓，佢地之故事又點樣呢？
香港講政治，好多時候只係集中講班政界大老，而唔係講老百姓。當然，講大老故事，讀者觀眾群會多啲，權威性多啲，但政治動員，市民才是主角，而唔單只係大老。坦白講，用功利之角度，單係六四之後的政治紅利，泛民依家仍然用緊，都係時候將主角畀番市民，係未？
至於團結云云，唔好再自欺欺人啦！講政改就四分五裂，講六四就團結一致，乜做人可以咁樣體腦分裂咩？政治最緊要係多元兼互相尊重，而唔係指責對手又叫乜嘢大家冇分裂之本錢。每次聽到泛民大老講完團結，轉頭又響政改方案互插鬆踭，真係火都嚟！