「鬼叫你唔理？開會又唔去咩！」我收到幾十萬元天價維修單欲哭無淚，仲俾同事串。
無錯，我係無去業主大會投票，因為我試過去諮詢會，問法團個大堂咁新，可唔可以唔裝修？點解咁簡單的工程要百幾萬？立刻有幾名「公仔人鄰居」圍住我 粗口問候，話我阻住「地球轉」，影響全部街坊，又話知我住邊座。我個心怯一怯，我住咗幾十年，從未見過佢哋，居然知我住邊？老公即刻厲一厲我，叫我「唔好 咁多事」。
其實我問到問題，係法團「皇恩浩蕩」﹗雖然全場幾百人，法團規定只准問兩條問題，個律師就一味幫住個主席，民政署個官就好似紙板人咁款，任得個法團 搞。最絕的係，雖然在場有唔少業主好勞氣，但法團在台上揸咪，台下發表意見或問問題居然唔准用咪，法團話如果其他業主唔出聲，我大聲講全場就會聽到喎。唉 ﹗嗰個禮堂成萬幾呎架，主席﹗
仲未完架，嗰個咩「獨立」顧問公司個測量師話就話幫我地小業主，但佢一味叫我哋乜都要換，乜都要整，差在無叫我哋重建咋﹗又話換外牆要幾多千萬，五個方案，八款用料，七七四十九種變化，我都唔識計條數，佢講啲「專業嘢」我又唔明，有街坊叫佢解釋多啲，佢就叫你自己睇文件。
但個顧問叫我地做多啲維修項目嗰陣就好落力，十足十Sales咁，講到我哋屋苑危樓咁款，只要夾錢大維修，學半山啲有錢人家咁，整番條露天行人電 梯，格調唔同晒，「山雞即刻變鳳凰」，樓價必然大升特升咁話喎。我老公做電梯嘅，聽完都呆咗，嗰度十級樓梯咋喎，仲有座頭每部都直落地面，諗起保養費就 襟計了。由於「公仔人鄰居」好似保安咁瞄住我哋兩公婆，好漢不吃眼前虧，我地只好當「時運高，聽唔到」，早啲返屋企大覺瞓。
好彩我精，唔再理，樓下陳生就唔熟性，成日去開會「阿吱阿咗摩洛哥」，架車咪俾人淋油囉！最近仲收到恐嚇信，叫佢唔好搞咁多無謂嘢，睇住阿B仔，唔係後悔莫及喎！附近乜乜花園仲得人驚，有業主搞咩「反圍標」俾人扑爆頭，要賣樓走佬添喎。嗰啲人搞「反圍標」，都未死過﹗
唉！雖然要俾幾十萬，我同老公講，破財擋災啦！隔籬阿婆就慘啦，俾埋棺材本都唔夠，要按樓交維修費，大鑊。
話時話，我地十年前先大維修完，今日俾人屈完，十年後會唔會食過返尋味㗎？
E-mail：[email protected]