人老精，鬼老靈。呢句嘢用響政治方面相當啱聽。白皮書出街之後，有傳媒老餅將佢塵封已久，用口一吹就成疊灰塵飛出嚟，隨時搞到鼻敏感發作嘅檔案攞出嚟對照一下，就睇到一個政治現實：三十年前，當中英傾緊聯合聲明嗰陣，北京之立場，同今日白皮書之東西有九成五接近。後來因應政治形勢需要，嗰陣北京之政治立場有些少微調，講多咗兩制，等你班Xiang Gang Ren舒服啲。依家成個香港袋咗落袋，咪一於響籠底攞番啲真嘢你睇。
至於你班Xiang Gang Ren係咪覺得畀人呃咗？well，視乎你點睇嘅。一隻羊，披住狼皮，始終都係一隻羊，唔會夜晚亂嗥，仲要肚餓食草，點都會穿崩。紅色大肥貓係咪真係一隻貓？定係東北老虎扮出嚟？哈哈！你話呢？
政壇老鬼好早之前教我，佢話上面冷眼旁觀，呢十九幾年(包埋九七年前of course)，香港政治人物個個用顯微鏡睇嘢，冇視野冇格局冇方向冇能量，蛇齋餅粽樣樣精，發展視野冇樣識，美帝野心唔反擊，而且冇一種綜觀全局之政治觀，唔懂得收放，小小事就會搞到好大兼且變成管治危機，咁樣真係唔掂，所以佢一直私下嘆曰，香港咁樣搞落去，遲早上面會全面接收也。
我演繹佢嘅講法係話，上面睇見香港班友，搞嚟搞去都搞唔掂，所謂香港制度之優越性原來係浮沙堆砌出嚟。例如香港官場廉潔云云，依家單法庭案件睇到啦！例如香港商人高效叻搵錢係自由經濟之展現云云，原來係官商勾結下之地產霸權；例如香港有法治云云，原來法院判罰社運人士同殖民地法院一樣咁嚴苛(當然口頭上一樣話判得輕，但原來香港咁多法律可以告到班反對派甩褲)，而且政治方面政客口水多過浪，政改方面，成班政客好似戴咗聾耳陳對耳咁樣，對於一些原則充耳不聞，咁樣落去，香港人淨係識得吵鬧又唔肯為自己前途負責，真係唔掂。
將白皮書放響呢個context底下，大家就會比較易明。白皮書講清楚管治權，講清楚一國先於兩制，講清楚上面之權力及底線，即係話畀你班Xiang Gang Ren知道，權力操之在我，假如你班Xiang Gang Ren唔識得管自己，港人治港治到一塌糊塗，經濟社會唔掂，民生唔得，任由美帝老千福響深水埗扮親民整窮人飯，北京就要親自落水，到嗰陣時，唔好怪上面要捲起衫袖，身水身汗落場。至於落場之後會點樣？唔知噃。
用呢個角度講，依家呢場波，吹緊黑哨之球證擺到明側埋一邊，對住Xiang Gang Ren出示黃牌，仲要係響個袋度先扮嘢，「潛」張紅牌出嚟又即刻收番，然後舉手出黃牌，等你班Xiang Gang Ren由嚇到面青到如釋重負，哈哈！驚未？
但係，呢一招只能夠嚇到普羅市民，嚇唔到血氣方剛之年輕人。依家班細路開口埋口講「自決」，點會咁易向紅色大肥貓低頭呢？