周周講政治，唔怕悶咩？唔怕，依家電子公投隨時指向八十萬大關，咁樣巨大之民意，北京冇理由睇唔到。之但係，大家做人仔女都會明白，要一個成日要逞強，樣樣都覺得自己叻過人嘅阿爸(通常香港之stereotype係潮州人家庭)認低威，好難嘅，仲慘過叫一個食咗幾十年煙嘅阿爸去戒煙。呢兩星期，政治震盪期又回歸了。
不如講下自己？上周六，出席新力量網絡搞嘅通識課程做講者。坦白講，我一早做咗學術逃兵，而且個人非常心急，成日惡形惡相對待學生，唔係好適合教書，因為依家教書同響街邊賣寬頻之sales一樣，笑口噬噬，罵不還口，當學生係顧客，咁樣至可以長做長有。點都好，講嘅題目係有關司法覆核與香港政治，響大學課程方面，嗰日只係當中的一小部分內容。
內容就唔好講太多，因為太悶。不過，討論到一個位嗰陣，就有學員問一個關於司法覆核與政治界線的問題。因為既然司法覆核方面，數據睇到政府贏的機會有七成幾，部分政策範圍有成八成以上，點睇政府都有著數。於是，政府叫人話，如果你係市民，你不服氣政府決定，大可司法覆核也，咁樣市民咪其實輸硬？即係政府玩晒乎？
我都唔想咁樣去簡化司法覆核對政府嘅衝擊。因為響外國，司法覆核能夠成為一個重要之制衡武器，主要有三點，第一係行政當局會自我約束，唔想有司法覆核來阻礙施政，所以推行政策方面，就係以避免違反行政/程序公義，要合法；第二係法院要夠薑，唔怕壓力去覆核政府之行政決定，唔怕有干擾；第三係我講嘅，提出司法覆核嘅社會團體及人士，要慎用司法覆核，一個唔小心，慎防歪理變合法。
依家呢個路福西領袖之政府，成日以為自己好強勢，好多嘢都會夾硬來，即使解來解去都解唔明，佢都會硬推政策，目的有兩個：第一，博你唔夠反對，因為反對的話，佢地有香江第一政治化妝師之準博士做新聞統籌，一定有方法將呢班反對派消音。第二，即使你夠薑去司法覆核，除咗要籌好多錢之外，政府都知道，過往紀錄所見，法庭有七成幾八成機會判政府贏，贏面高的話，不妨夾硬來，因為即使輸嘅話，都係納稅人俾錢，係咪？而且，輸的話，外界之路福西領袖支持者，會批評法官唔公道，有外部勢力干預，以平衡法庭判決之衝擊，係咪？
不過，萬一，即係萬一法庭判政府司法覆核勝訴的話，即係話政府夾硬來的政策原來係「合法」，嘩！到時政府就可以聲大大咁樣鬧反對聲音，兼且更會理直氣壯地不斷響其他政策夾硬來。咁嘅結果，就會將歪理變合法，死未？
所以，大家唔好成日將基哥之電視發牌「公義」，交俾法庭，借司法覆核翻身，因為萬一法庭判基哥輸，就真係衰過以前。依家基哥倒不如將申請牌照之事，拖到2016年初，咁樣可能仲有機會，因為路福西領袖要連任，不如博佢會忽然親民，有求必應呢？哈哈！