自己親自下廚弄出來的東西，總會想別人食多啲。
例如中國母親的湯水。我每次回老家食飯，一入門口總是要先乾一碗湯、開好枱準備食飯時再一碗、食完飯飽嗝都未打又來一碗，然後阿媽還會窮追不捨：「多碗湯俾你吖！飽？你平時又夜瞓又食埋街外啲味精嘢，今日啲湯煲得好靚呀……」（下刪數百字直至你話：「好啦半碗啦。」，裝出來的當然又是滿滿的一碗湯）。
又例如外國grandma的曲奇餅。以前遇過一個洋老太太host，很喜歡焗曲奇的，每次焗完都例牌第一時間來問：「You want some cookies？」其實已經捧了一大盤給你。你不好意思拒絕老人家但不拒絕你便大鑊了，那雙小小的老花眼是要眼定定看著你把最後一塊都吃乾淨，才會心甘情願落樓，焗round two俾你食。
女人堅持起上來，旁人往往難纓其鋒。面對阿媽和grandma的堅持，我們尚且可以hea過她們，大不了令老人家傷心罷；有些人的堅持，卻是搵命博的。前幾天在田納西州的孟菲斯動物園，有個女子便示範了何謂堅持：其實上星期她也來過，把一些疑似食物拋入獅子園區，當時職員已立即趕她離開。
這次她更進一步，爬過圍欄、走到與獅子們只隔幾條通電鐵絲的地方，唱歌。沒錯，是高聲唱歌。歌聲引來獅子之後，她終於亮出終極武器：曲奇餅。原來她是想獅子們「try my cookie」，有目擊者說她一邊餵還一邊說：「你哋知唔知我幾掛住你哋？」事後她被終身禁止入園。而除了輪迴轉世，實在找不到更好的理由去解釋她的行為。
阿鼻~微博
t.sina.com.cn/nosechoy
並請在FB搜尋「阿鼻的飲食字典」並於10秒內按Like