記者Z是有心人，近幾年都有在記協幫手，出力回饋同業。佢最近問我：「有無聽過Run or Dye五公里比賽呀？不如引入香港搞啦！」
「香港算數啦！類似的Colour Run，上年都打算來香港搞，但香港政府唔肯封路，呢啲咁好玩的比賽，根本無可能喺香港搞。你唔要，上面的深圳多謝你，Colour Run最後去咗深圳搞了。反而有得諗諗，將美國的Capitol Challenge引入香港，話唔定係記協或一眾傳媒牽頭下，有機會搞得成。」
「講嚟聽下啦？Capitol Challenge係乜東東㗎？」
「呢個比賽每年5月喺華府舉辦，全長只係跑3英里(約5公里)，歡迎國會、行政機關、司法機關、內閣、行政機關、副總統辦公室以及駐華府的記者組隊參與，上限係140隊，每隊要有5個成員，仲搵到好多商界贊助，收益全部捐給一個導盲犬組織。」
「比賽都好體現美國民主選舉的精神㗎，舉個例，來自國會的隊伍，一定要由民選的議員做隊長，成員就可以搵助理、國會職員或議員的直系親屬；司法機關方面，只有經參議員確認的聯邦法官，先有資格做隊長，隊員就可以搵法院的職員。」
「無論你來自共和黨、民主黨抑或白宮，無論財政懸崖、全民醫療改革、減稅加稅、調高舉債上限、派兵海外、墮胎合法化、禁止槍械如何鬥過你死我活，比賽日大家都會放下歧見，一同站在起跑線等起步，有助緩和壁壘分明黨爭，以及眾議院多數黨同白宮的緊張關係。」
「梁振英未必唔制㗎！如果班建制派做多啲運動，跑快少少，吳亮星就唔使為咗等埋建制派投票而被千夫所指啦。嗱，香港政治氣氛咁差，特別係新立法會面積咁大，唔好似以前舊立法會咁，兜口兜面都會撞到，而家就連曾鈺成都唔認得卡片蘇個副手叫乜水。你知啦，識同唔識真係差好遠，識你就容易手下留情，唔識你就唔使俾面。」
「如果搞到個類似長跑比賽，吸引咗中右和政府代表支持參與，就算政治上係勢不兩立的敵人，但跑步上就係跑友；就算係議會內俾你寸到一棟都冇，都可以跑贏你出番啖氣。」
「話晒只係5公里，一個鐘肯定跑得完，如果政府肯搵個星期日朝早，封添馬艦中環海濱一帶兩粒鐘，已經綽綽有餘了。只可惜園丁唔係從政，又唔係做傳媒，就算香港版Capitol Run搞得成，想參加都無資格囉！」