久未露面嘅帝國集團主席郭炳湘(圖)噚日現身，原來係為咗佢公司同麗新發展合作嘅地產項目藍塘傲推出首批單位。大家咁耐無見郭生，除咗聽佢推介樓盤之外，都關心佢有無探望細佬郭炳江，佢就話：「有，已經飲咗茶！」 郭生咁有信心親身出席記招，更加令Ray想知道個盤有幾好。郭生話，位置係全將軍澳最好，首批亦會定價平啲，希望吸引大家關注。 早前帝國集團與長實地產合作發展君柏，今次則夥拍麗新，未來會否與新鴻基地產合作？郭生就話要視乎項目，與任何發展商均有機會合作。佢仲話，帝國集團與其他夥伴合作，係「一人計短，二人計長」，未來仍會物色地皮，有機會亦會獨資發展。 大家都好奇，點解個集團取名帝國？郭生笑笑口話「都幾好聽」，仲俾人有穩定同管理好嘅感覺，不過佢話暫時未有計劃上市。
Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。