士多啤梨奇亞籽椰子乳酪 $42
久唔久我都會去Pret A Manger嗰度清清腸胃，食杯乳酪又或者飲碗熱湯當一餐，懶係健康咁，令自己個心好過啲(其實第日咪又係大魚大肉)！
最近佢哋引入咗英國嘅素食餐單，值得一提嘅係，原來佢哋上年喺社交網絡度問過食客，想唔想佢哋賣素食，點不知有成萬個人say yes！咁啲管理層梗係要做下嘢啦！於是就喺倫敦開設咗一間pop up store。聽講當時佢哋預計銷售麻麻，以為會跌，就一心當滿足下班粉絲，蝕都照做；點不知反應好好，營業額仲多咗七成！咁呢一間pop up store當然唔使再pop up啦。佢哋仲將個menu推廣，一年之後，即係依家，更將佢引入香港！
我最鍾意佢個椰子乳酪，佢係專為對奶有敏感的人士而設。用椰子打成奶白色嘅乳酪，無論質感同賣相都非常似，加埋士多啤梨jam，整體同佢地皇牌嘅Five berries yogurt做到九成似，仲多咗陣椰子香添。
食唔食素係個人選擇，不過一星期食一餐素食，都唔係好困難啫！當幫自己清下腸胃又好，對動物好啲又好，不如試下踏出呢一步啊！
Pret A Manger www.pret.hk
訂閱 《am730》 電子報
每周精選內容直送收件箱📧
掌握重要新聞資訊📈 財經投資🤖AI科技生活 🍽 美食玩樂 🛍 消費優惠 📰 城中熱話
提交代表本人同意接收am730所發出的推廣電郵，你可查閱本網站的私隱政策。