每個人都有自己嘅comfort food，可以係大魚大肉、可以係喪食放題、可以係飲酒飲通宵……而我嘅comfort food，係觀塘茶記嘅香茅豬扒飯。點解？冇得解㗎！鍾意咪鍾意囉！個個都食得好，唔通個個都想食得好咩？
因為工作關係，平日試埋試埋唔少好嘢，或者因為咁，個人開始變得嘴刁，開始變得嫌三嫌四，好聽啲咪叫做有要求囉！覺得去得高級餐廳，俾得咁大嚿錢，唔係俾啲劣食hea我呀嘛？為免自己食到背脊骨落(加上人工少，冇乜錢我使)，所以放假都會食得平民些少。呢間茶記，每個月都會幫襯兩、三次，次次都獨沽一味食香茅豬扒飯。豬扒用大量香茅同香料醃足24個鐘，非常入味，加上用咖喱同麻辣醬煮過嘅肉醬同煎到半熟嘅太陽蛋，簡直係人間美食！雖然佢個肉醬極級油膩，食10次有7次都食到我肚屙！但人就係犯賤，屙都照食，鬼叫自己個腸胃咁唔爭氣咩！(陶大宇掩面哎呀mode)
新永成茶檔 觀塘成業街7號東廣場地下G52號舖
辣肉碎香茅豬扒煎蛋飯 $45