紀念碑上有一個小小的十字架，面向大西洋海峽。
愛，係一份承諾，就算去到天涯海角，我都會在你身旁。山盟海誓、無懼風浪、有粥食粥、有歐元使歐元。就算天各一方，最遠的一角，都只不過係一程飛機，再唔係就視像通話，幾遠都可見面再講……
講到咁誇張，究竟最遠條路又有幾長。位於葡萄牙里斯本附近嘅Cabo da Roca，中譯羅卡角，就係歐洲大陸最西邊的一個角落。當然如果以葡萄牙嘅領土去計，最西點應該係亞速爾群島(葡語Açores)，不過羅卡角都已經算係「天涯海角」，日落之邦。
前望大洋，後懷理想
羅卡角位於北緯38度，西經9度，與里斯本距離只有大約40公里，所以都叫做係必去嘅景點。呢個景點只有風景可言，冇乜特別設施，意義大於一切，個個都係「到此一遊」。海角果然有天涯，有成140米高，而高原之上起了燈塔、紀念碑同一隻手數得晒嘅建築物，保留了大自然壯觀的吸引。
紀念碑上有一個小小的十字架，面向著大西洋海峽，有如昔日還未填海的調景嶺上，由司務道所建立的靈實醫院，其十字架和燈塔照耀著迷霧中的漁船。十字架紀念碑刻上一句葡萄牙詩人賈梅士(Luís Vaz de Camões)的名言「AQUI……ONDE A TERRA SE ACABA E O MAR COMEÇA……」，意即是「這裡……陸地的終點，海洋的起點……」，地之角、海之始，真有意思。
前有國勢，後無為繼
又介紹番個燈塔建築群(英文Lighthouse較為傳神)，高22米，半紅半白，建於1772年。十五、十六世紀，是葡萄牙航海盛世嘅霸權時代，遠征探險的船隊所見到最後的陸地就係呢度，當然亦為回程的船員帶來指引明光，也是守衛里斯本的第一道防線。不過隨着1755年里斯本大地震，城市及港口連帶葡萄牙均嚴重衰落，懸崖之上的軍事設施亦相繼撤退，亦只剩下這建築群和改建的遊客中心。
去到咁「盡」，邊皮嘅遊客中心當然冇乜嘢好問，其任務只係得番簽發證書(Certificado)和售賣紀念品。通常攞得呢張最西嘅證書，都會決心去埋挪威的北角及南非的好望角，砌夠一set，志在四方。
前人栽種，後人享福
昔日航海探索新大陸嘅冒險精神，叫人不甘只走到眼見所踏世界盡頭。一代人復一代人，地之盡頭為海之開首，眺望海峽，出海揚帆，有如《荒原上》一書所記載司務道由零開始，為別人的好益處而那怕艱辛。呢份愛的承諾，正係我們嘅香港精神，同舟航行。
