好想知道雲加喺觀眾席上，睇到阿仙奴對住英冠嘅森林都被攻入4球，有乜感受？教咗阿仙奴超過21年嘅雲加，從來唔似依家嘅少帥咁，好鍾意喺鏡頭面前表現出激情一面；所以呢期罰佢老人家上看台做觀眾，對班波臨場運作影響唔大。不過快車期起，兵工廠愈踢愈唔對路，尤其防線近3場波輸咗4個12碼，近5戰失12球。長期欠出色防中作屏障係主因，阿仙奴已出現今季最大嘅危機，本月雲爺爺又玩孤寒唔入貨嘅話，今季點只四大皆空，隨時連續兩季英超唔入前四。
英足盃排弱陣致大敗出局，雲爺應該係想將火力集中，應付明晚英聯盃4強首回合作客硬撼車仔。始終仲差一步入決賽，又有下月歐霸盃可博，踢得咁密，傷兵又多，唯有放輕最長遠嗰隻足總盃。不過幾日前佢哋主場鬥車仔，唔係對手嘅箭頭艾華路莫拉達做敗家仔，兵工廠必敗；查兩軍近6次喺史丹福橋對撼，車仔贏足5次，今次又要做座上客嘅雲爺爺，唔做好中場掃蕩幫輕防線，準會在貴賓席見證車仔更猛烈嘅轟炸。
ADVERTISEMENT
