阿仙奴不夠好

全季380場英超打完，極度刺激而當中每一位參與者又極度虛耗，唔係求其喺樹林邊偷拍對家練波，就可取得終極成功。英超爭霸者須長期受「一周三賽」嘅煎熬先可歷煉而成，更要無視網上haters同所謂英超名宿球評家刷流量嘅不停批評；所以當代嘅每一屆英超冠軍，將永遠無法媲美2003/04年度阿仙奴全季不敗嘅invincibles，覺得唔夠好只係欣賞角度唔同咗，只一味憑經驗同感覺回味以前。

阿仙奴係咪平庸？今季英超入咗71球，唔係史上最少入球冠軍前5位；失咗27球亦都做唔到英超歷代最強防守冠軍隊前5位。封王靠嘅係人腳勝在平均又齊心，死球戰術同防守極度出色，風格有啲似前英超、八十年尾嘅格拉咸悶蛋足球為阿仙奴兩度封王聯賽。不過新季英超一切歸零從頭開始，阿仙奴要冧莊明顯要添球星級鋒將變招，換帥嘅曼城同車路士將有新天，回起嘅紅魔虎視眈眈；利物浦季初要急求交代，甚至死過翻生嘅熱刺有機會重頭嚟過。新一季英超兩個多月後又重新開戰，嚟緊104場世盃，球迷宜當回氣唞下氣。