「士多啤梨蘋果橙，蘋果橙士多啤梨點樣揀，十蚊兩梳蕉三蚊一隻橙……」一個地方集中晒咁多選擇，阿媽我好亂啊！
果欄仍能保留一份香港四十年代的味道。
阿媽話齋，一日一蘋果，醫生遠離我，大個知道邏輯上其實係牙醫先至啱；不過而家如果一日一富士蘋果，隨時貴過一餐「頹飯」！縱然各地美食不斷鑽研，但永遠都不能取代天然食物去滿足舌尖。
變遷中密密發展
晨光初現，一眾街坊果粉，無遠弗屆，唔係等舊日BlackBerry手機，唔係炒蘋果X水果S，而係等住一箱箱新鮮外地進口水果開箱。非為炒賣，實為自用，真真正正的將Apple去Openbox！
原名「九龍水果批發市場」嘅油麻地果欄，最初期形成為水果集散地於1913年，本為傳統墟市，至今百多年歷史；早於1913年之前，只是以草棚搭成，而坊間名字「果欄」為珠三角對水果批發市集之俗稱。直至三十年代，港府開始批地，果商才能正式免受風吹雨打、日曬雨淋，興建搬遷至一兩層高，以磚頭石塊建成的建築物內經營。早期區內果欄附近有如集散街市，從事本地及內地進口食品交易。渡船街、窩打老道以家禽海鮮為主，而新填地街嘅果菜欄則為水果及蔬菜為主，加上乾貨和食米，整區可謂九龍新鮮食物嘅總匯。
面向渡船街外圍的壁畫。
難得日常使用中的二級歷史建築。
果欄原為果菜欄，雛形始於1913年，建於三十年代。
鬧市中密密耕耘
果菜欄近佐敦一邊原為蔬菜批發巿場，到1965年長沙灣蔬菜批發市場及1974年長沙灣臨時家禽批發市場啟用後，雞欄和菜欄相繼搬遷。雖然作為分隔蔬菜與水果批發市場的石磚牆已經不復存在，但仍見到當年分隔的蛛絲馬跡，只要細心察看，在石棉瓦頂下的磚牆石柱仍然存留，鎮守油麻地果欄幾代家庭；亦曾見好幾棵六十多年歷史嘅石牆樹，無奈其中因為怕石牆承受不住倒塌，已經被鋸掉，有如恐怕果欄一樣未能延續下去開枝散葉。
風雨飄搖一直在影響油麻地果欄嘅老樹與及一磚一瓦，這個被評為二級嘅歷史建築，依舊在夜闌之處燈火通明；工人辛勤工作，每日批發及零售都忙個不停，但香港西瓜靠大邊，香港人多地方細，在地產優先形勢下，若沒有這歷史建築評級，恐怕寶貴地段上之寶貴歷史特色，已經隨著其他批發市場淪為地產項目。
保育中密密新鮮
吃不到的葡萄唔一定酸，但願修成正果，油麻地果欄可以繼續被保育下去，香港下一代小朋友依然可以食到新鮮生果，長大唔使只做果汁小姐同先生。要不然又怎會感受到新鮮蘋果與牙齒磨擦嘅神奇潔淨感覺呢！不過隨著知識及科技嘅進步，記得使用牙線以及牙刷才為最有效的深層潔淨，小朋友記得學；食蘋果之餘，記得最少每年一次見見牙醫。
具六十多年歷史之石牆樹。